История » Тропарь, кондак и молитва Свт.Антонию Вологодскому

Тропарь, кондак и молитва cвятителю Антонию, епископу Вологодскому и Великопермскому, чудотворцу

Святитель Антоний ВологодскийТропарь, глас 4

Иже от юности, Богомудре, возследуя Христу во бдениих и в пощениих пребывая, и паству от Бога дарованную ти добре пасый и учений Божественных исполняя и в жизненный путь наставляя: отнюду же и архиерейства саном почтеся, церковь и люди возвеселил еси; и по преставлении своем чудес лучи испущаеши, недугом с верою приходящим исцеление подая, и слепу младенцу свет дарова, Угодниче Христов, Святителю Антоние, предстоя престолу Христову с лики Ангельскими, с ними же моли Его о нас, притекающих к честной твоей раце, получити от Него оставление грехов и велию милость.


Кондак, глас 8

Возвеселися, Христова честная церковь, приимши тя в недра своя пастыря и учителя; мыже вернии людие прославляем Подавшаго ти благодать неоскудну, яже твориши преславная чудеса от честныя си раки. Тем, Святителю, не престай моля Христа, Ему же угодил еси, о нас хвалящих и чтущих тя, к честней раце твоей притекающих, подати милость зде и в день судный, да зовем ти: радуйся, Святителю Антоние, граду нашему похвала и утверждение!


Молитва

О священная главо, богоносне отче наш, богомудре святителю Христов Антоние, пастырю наш добрый. Градов Вологды и Перьми архиерею преславный и украшение пресветлое. Предивный чудотворче, ко святым мощем твоим (ко святей иконе твоей) притекающе, усердно молим тя: призри на ны, память твою совершающих и под кров молитв твоих ныне прибегающих, пролей теплое твое моление ко Спасу всех, яко да оградит миром державу нашу, святыя обители, грады и веси ея и град наш добре да сохранит, благочестие людем Своим дарует, Православную же Церковь паки и паки да утвердит и исполнит вся благая прошения рабовь Своих, яже ко спасению.

Еще же тя молим о Великом Господине и Отце нашем, Святейшем Патриарсе Московстем и всея Руси Алексии и о Господине нашем приемнике твоем Преосвященнейшем архиепископе Максимилиане, да покрыет я Бог всесильною Своею Десницею и дарует им право правити Слово Своея Истины.
О всепозлащенный сосуде Всесвятаго Духа, буди нам ходатай вечных благ, да прославляем дивнаго во святых угодницех Своих Бога Нашего Отца и Сына и Святаго Духа, всегда, ныне и присно и во веки веков. Аминь.